Казанское Высшее Мусульманское Медресе имени 1000-летия принятия Ислама

Ильяс хәзрәт Ульяновскида булып кайтты

Мәдрәсә әһелләре Ульяновск шәһәрендә булып, мөселман кардәшләр тормышы белән танышып кайтты. Алар анда Ульяновск шәһәре Идел Аръягы районының “Ульяновск өлкәсенең  татар милли-мәдәниятле автономия” иҗтимагый оешма советы рәисе һәм беренче мөселманнар җәмгыяте рәисе Рафаэль хәзрәт Нәҗметдинев чакыруы буенча барды.

Казан кунаклары белән аралашырга милли хәрәкәтнең иң мөхтәрәм аксакаллары Шәүкәт хаҗи Богданов һәм Варис хәзрәт Равилов та чакырылган иде. Очрашуда шулай уг милләтпәрвәр галимә Резеда ханым Садыйкова да катнашты.

Мәдрәсә кунакларын Идел Аръягы районының “Ульяновск өлкәсенең  татар милли-мәдәниятле автономия” иҗтимагый оешма советы рәисе, Яңа шәһәр мөселман мәхәлләсе имам-хатыйбы Рафаэль хәзрәт Нәҗметдинов каршы алды. Ул Ульяновск шәһәренең Идел аръягы районы татар милли-мәдәни мохтарияте эше белән таныштырды.

Әлеге оешма Ульяновскиның иң зур районнарының берсендә эшләп, шактый эш-гамәлләр күрсәтергә өлгерде.  Мохтарият рәисе үзенең тырышлыгы, җирле хакимият һәм милләттәшләребез белән уртак тел таба белүе нәтиҗәсендә лаеклы ихтирам яулый алды. 30 елдан артык Ульян өлкәсенең Идел аръягы районында халкыбызның милли бәйрәме Сабантуйлар оештыручы да. Милләтара дуслыкны, Ислам диненә дәгъвәт итүче дә. Мөселман кардәшләрне җыеп корбан, ифтар мәҗлесләре үткәрү, дисеңме, милләттәшләрне сый тулы өстәлләр артында очраштырулар дисеңме, мәдәни бәйгеләр, дисеңме, ул барысын да оештырырга өлгерә. Иң мөһиме алар саф татар телендә уза. Автономия каршында яшь  буын өчен клуб оештырылган. Анда бергәләп татарча концертлар  кую, таныштыру, үзара аралаштыру максаты куела.   Идел аръягы районы татар милли мохтарияте татар эшмәкәрләре, район, шәһәр, өлкә хакимияте җитәкчеләренең ярдәмен тоеп яши.

Хәзерге вакытта бу җирлектә милли мәдәни-мәрифәтчелек мәркәзе төзелеп бетеп, Татарстан рәисе Рөстәм Миннеханов катнашында үзенең ишекләрен ачты. Аның янында милли көнкүреш музее матур гына эшләп килә. Килгән кунаклар биналарны карап чыктылар, эшлекле киңәшләрен бирделәр.

Иң җылы сыйләшүләр әлбәттә Яңа шәһәр мөселманнары белән булды. Килгән кунаклар мәхәллә халкы белән аралашты, яшьлек хатирәләре белән уртаклашты. Җыелган мөселманнарга мөрәҗәгать итеп Ильяс хәзрәт: “Мәхәлләгездә башкарыла торган олы эшләрегезне күреп, саф татар телендә вәгазь сөйләнгәнне, дога кылынганны, аралашканыгызны ишетеп сөендек. Гамәлләребезне иманга тугрылык, туган милләтебезгә мәхәббәт белән алып барсак уңышка ирешербез ин шәә Аллаһ”, - дип мөрәҗәгать итте.

Ильяс хәзрәт Шәүкәт хаҗи Богданов туган көне белән тәбрикләде. Аңа мәдрәсә бүләкләрен, тәбрикләү хатын тапшырды. Рафаэль хәзрәт Шәүкәт агага медаль тапшырды.

Ильяс хәзрәт шулай ук бу җирлектә эшләүче мәдрәсә белән танышты. Шәкертләрнең Коръән укыганын тыңлады, аларның ихтияҗларын белеште. Шулай ук ул мөгаллимнәр азат хәзрәт һәм Рафик хәзрәт белән фикер алышты.

Сәфәр уңаенда мәдрәсә әһелләре шулай ук Тәтеш, Апас мәчетләрендә булдылар һәм анда хезмәт куючы мәдрәсә шәкертләре белән аралаштылар.

“Ульяновскига бару шәһәр мөселманнары, өлкә татарлары тормышы белән якыннан танышу, тәҗрибә уртаклашу өчен дә бик файдалы булды. Мәдрәсәнең эшчәнлеген күреп хозурландык. Аннан гыйбрәт алып кайттык. Яшьлек хатирәләрен яңарттык. Баруны оештырган өчен Рафаэль хәзрәткә күп рәхмәтләребезне җиткерәбез”, - диде Ильяс хәзрәт сәфәрдән кайткач.