Приемная комиссия: (843) 278-31-96
г. Казань, ул. М.Гафури, 67.

Казанское Высшее Мусульманское Медресе имени 1000-летия принятия Ислама

Ильяс хәзрәт “Нур-Ихлас” мәчете мәхәлләсе оешуның 30 еллык юбилеенда катнашты

Бүген, сафәр аеның 8нче көнендә (24нче августта), Чаллы шәһәрендә зурлап “Нур-Ихлас” мәчете мәхәлләсе оешуның 30 еллык юбилее билгеләп үтелде. Биредә шулай ук тагын бер истәлекле вакыйга – мәчет янында сафка баскан Мәгърифәт үзәген тәкъдим итү чарасы узды. Әлеге чараларда Татарстан мөфтие Камил хәзрәт Сәмигуллин, Татарстанның баш казые Җәлил хәзрәт Фазлыев, Мөфтинең мөхтәсибәтләр белән эшләү буенча урынбасары Равил хәзрәт Зөфәров, Татарстан мөфтиятенең Аксакаллар шурасы рәисе Айрат хәзрәт Әюпов, Чаллы шәһәре башкарма комитеты җитәкчесе урынбасары Рамил Хәлимов, күпләгән имам-мөхтәсибләр, хөрмәтле Чаллы хәзрәтләре, аксакаллар, имамнар, мәхәллә халкы, әлеге мәчет төзелешенә өлеш керткән фидакарь затлар катнашты. 


IMG_9329_1.jpg


Юбилей чарасы Коръән аятьләре уку һәм Чаллы шәһәре имам-мөхтәсибе Әлфәс хәзрәт Гайфуллинның котлавы белән башланып китте. Чаллы шәһәре башкарма комитеты җитәкчесе урынбасары Рамил Хәлимов шулай ук шәһәр башлыгы Наил Гамбәр улы Мәһдиев исеменнән рәхмәт сүзләрен җиткерде.


Мәчет юбилеена җыелучыларны мөфти Камил хәзрәт Сәмигуллин сәламләде, ул үз чыгышында җәмгыятьтә ислам дине кыйммәтләрен үстерүдә мәчетләрнең, аерым алганда, “Нур-Ихлас” мәхәлләсенең әһәмиятен билгеләп үтте. Алга таба Мөфти Коръәнне өйрәнү кирәклегенә басым ясады: “Үзебезгә бер сорау бирергә кирәк: Коръән белән яшибезме соң? Коръән безнең тормышыбызда нинди урын ала? Күпме укыйбыз без? Һәр мөселман, иң ким дигәндә, аны елына ике тапкыр укып чыгарга тиеш. Чөнки Пәйгамбәребезﷺ соңгы рамазанда Җәбраил галәйһиссәләм белән берлектә ике тапкыр укып чыккан Коръәнне...” 


IMG_9448.jpg

 

Татарстанның баш казые Җәлил хәзрәт Фазлыев: “Мәчетне дә, мәдрәсәне дә, акчаң булса, төзеп куярга була, әмма кешеләр күңеленә мәчет салу авыррак, аны бернинди акча белән дә кертеп булмый. Яңа ачылган мәдрәсә кешеләрнең күңеленә мәчет салуга хезмәт итсен иде”, – дигән теләкләрен ирештерде.  


IMG_9484.jpg


Мәчет мәхәлләсе 1993нче елның мартында шәһәрнең 48нче бистәсендә оеша. Шунысын да билгеләп үтәргә кирәк, “Нур-Ихлас” мәчете бүгенге көнгә кадәр мөхтәсибәт һәм шәһәрнең җәмигъ мәчете ролен дә үтәп килде. 


IMG_9666_0.jpg


Бүгенге юбилей чарасында Чаллы мөхтәсибәте тарафыннан имам-мөхтәсиб Әлфәс хәзрәт Гайфуллин “Нур-Ихлас” мәчете төзелешендә катнашкан иганәчеләргә, мөгаллимнәргә рәхмәт сүзләрен җиткерде һәм рәхмәт хатлары, бүләкләр тапшырды.


IMG_9448.jpg


Үзләренең ихлас хезмәтләре белән ислам динен үстерүгә, мәхәллә тормышына зур өлеш керткән шәхесләргә Татарстан мөфтиятенең 30 еллыгы медальләре, мөфтиятнең рәхмәт хатлары һәм башка истәлекле бүләкләр бирелде.


Аннары чарага җыелган кунаклар “Нур-Ихлас” мәчете янында урнашкан Дини-мәгърифәт үзәге эшчәнлеге белән танышты. Ул Ринат Глюм улы Җәләлов һәм аның гаиләсе күрсәткән зур ярдәм нәтиҗәсендә төзелгән. Хәзерге вакытта ике катлы Мәгърифәт үзәге бинасында мәчет каршындагы курслар алып барыла, балалар өчен төрле чаралар оештырыла, мөселман товарлары кибетләре эшли. Бинада уку сыйныфлары заман таләпләренә туры китереп җиһазландырылган, интерактив такталар куелган.